گهیځ
کابل/ګهیځ/ د لړم ۶مه او د نوامبر لومړۍ
د بښنې نړیوال سازمان په بدخشان کې له ښځینه محصلینو سره د سرپرست حکومت د ځواکونو پر چلند سخته نیوکه کړې او د دوی وهل او ډبول یې ستر شرم او سپکاوی بللی دی.
په افغانستان کې د دغه سازمان څانګې ویلي چې سرپرست حکومت نړۍ ته ډاډ ورکوي چې بشري حقونه یې خوندي کړي، خو په عمل کې د دوی دا خبرې دروغ او د رسمیت پېژندلو لپاره یوه هڅه ده.
د دغه سازمان د افغان څانګې کمپاینرې سمیرا حمیدي ویلي، دوی په ښکاره وايي چې د پوهنتون محصلینې دې له کومې ستونزې پرته زدکړې وکړي، خو په وینا یې چې په عمل کې داسې نه دي.
دا په داسې حال کې ده چې پرون د بدخشان پوهنتون یو شمېر محصلینو ادعا وکړه چې د امر باالمعروف کسانو د چادري نه اغوستلو په پار پوهنتون ته نه دي پرېښې او د اعتراض پر مهال یې وهلې او ډبولې هم دي.
بلخوا پر خواله رسنیو یو شمېر خپرو شویو ویډیوګانو او تصویرونو کې ښکاري چې یو طالب د پوهنتون په دروازه کې ولاړې محصلینې په کېبلونو وهي او شړي یې.
خو په بدخشان کې د امرباالمعروف ادارې مشر ویلي، چې له ښځینه محصلینو سره دا ډول چلند د دوی د استازو نه، بلکې د یاد پوهنتون د ارشاد کمېټې کړی و.
خانه / ګهیځ نیوز / سیاست / افغانستان؛ د بخښنې نړیوال سازمان بدخشان کې له پوهنتون څخه د ښځینه محصلینو شړل او د هغوی وهل بې عبدالتي بللې