گهیځ
کابل/ګهیځ: نن شنبه (د تلې/میزان ۱۶مه او د سپټمبر ۸مه نېټه ده) د بلخ د صنعت او سوداګرۍ خونې چارواکي په دغه ولایت کې د ۲ میلیونه ډالرو په ارزښت د مالوچو د پروسس یوې فابریکې له جوړېدو خبر ور کوي.
باختر دولتي خبري اژانس د یادې خونې د چارواکو له ویلي، چې دا فابریکه د ۲ میلیون ډالرو په ارزښت د یو خصوصي سکټور لخوا جوړه او ګټې اخیستنې ته سپارل شوې ده.
د صیام انټرنشنل کارخونې مشر «سید محمد هاشم هاشمي» ویلي چې دا فابریکه به په ۲۴ ساعتونو کې د ۷۰ زرو کیلو ګرامه مالوچو د پروسس وړتیا ولري.
د بلخ د صنعت او سوداګرۍ خونې چارواکو دا هم ویلي چې د مالوچو په برخه کې به دا فابریکه د افغانستان لپاره ډېره ګټوره ثابته شي.
بلخ یو له هغو ولایتونو دی چې په دې وروستیو کې ترې د ځینو پروژو د جوړېدو خبر ورکړل شوی دی.
د دغه ولایت سیمه ییزو چارواکو ویلي چې په بلخ کې اوس مهال تر ۳۰۰ زیاتې وړې او لویې کارخونې فعالیت لري.
