د افغانستان دفاع وزیر اماراتو کې له یو شمېر افغانانو سره کتلي

کابل-گهیځ نیوز ( د قوس/ليندۍ ۱۴)
له دفاع وزارته په خپره شوې خبرپاڼه کې راغلي چې ملا محمد یعقوب مجاهد دغه لیدنه کې د ټولو افغانانو ترمنځ پر زغم، اتحاد او يووالي ټينګار کړی دی.
د خبرپاڼې له قوله ویل شوي چې ملا محمد یعقوب ټولو قومونو ته په افغان سياست کې په برخې ورکولو ټینګار کړی او هلته د مېشتو هېوادوالو ستونزې یې اورېدلي دي.
دفاع وزیر زیاته کړې، افغانستان د ټولو افغانانو کور دی که هغه دننه په هېواد کې وي او که بهر، باید په افغانستان کې پانګونه وکړي. نوموړي ویلي، د ټولو ستونزو د هوارولو لپاره تر خپل وسه هڅې کوي او له ټولو افغانانو هیله کوي چي تر اسلام وروسته وطن ته ترجیح ورکړي. که له وطن سره لیونۍ مینه ونه لري او هر یو خپل مسؤولیت ونه ګڼي دا وطن نه جوړيږي.
نوموړي په دې وينا کې په سرپرست حکومت کې د ټولو افغانانو پر ګډون هم ټينكار کړی دی.
په ورته وخت کې پخواني ولسمشر حامد کرزي او د افغانستان لپاره د امریکا ځانګړیي استازي ټام ویسټ هم اماراتو ته په سفر ورغلي دي.
ـــــــــــــــــــــــ
د ګهیځ له ټلیګرام خبري چینل سره یو ځای شئ⬇️
https://t.me/+AuWDZ2LArLI2MWE1