گهیځ
کابل-ګهیځ نیوز( د مرغومي درېیمه ۱۴۰۱):
د حزب اسلامي مشر انجنیر حکمتیار پداسې حال کې چې د نجونو د لوړو زده کړو په اړه یې په محتاطانه لهجه انتقاد وکړ، په تېر جمهوریت کې یې د افغان مېرمنو پر فعالیت، لباس او کار کړنه هم ګوت نیونه وکړه.
نوموړي چې په کابل کې د خپل دفتر او هستوګنځي په جومات کې د جمعې په لمانځه کې لمونځ کوونکو ته خبرې کولې، ویې ویل چې:” غربپالو غوښتل په كابل كي هغه څه نندارې ته وړاندي كړي چي د پاريس او لندن په نايټ كلپونو كي ليدل كېږي.”
د حزب اسلامي مشر همدا راز د نجونو د تعليم په اړه د مخالفتونو په تړاو زیاته کړه چې دا مخالفتونه او بیا هغې ته د ديني او مذهبي رنګ وركولو اصلي لامل هغه حساسيتونه دي چي دده په خبره عامل بې مهاره او لنډغره ډېموكراسي او اوباش غرب پال وو.
انجنیر حکمتیار همدارنګه د اوسني حکومت له خوا پر ښځو لګول شویو ځینو بندیزونو ته هم ګوت نیونه وکړه، آن جومات او دیني زده کړو ته د نجونو نه پرېښودل یې د یهودانو د مذهب له ځینو اوسنیو دودونو سره مشابه وګڼل.
د حزب اسلامي مشر په خپلو خبرو کې د اسلام د لومړیو پېړیو او په تېره بیا د رسول الله -صلی الله علیه
وسلم- د ژوند وخت ته اشاره وکړه او زیاته یې کړه چې په هغه وخت کې مېرمنو او نجونو پنځه وخته لمونځونه د اسلام په لومړني جومات او لومړنۍ مدرسې کې ترسره كول او دده په خبره ښځې او میرمنې هغه وخت جهاد ته تللې او تجارت ئې كولو.
ـــــــــــــــــــــــ
د نورو خبرونو لپاره زموږ له ټلیګرام، ویب سایټ او د فېسبوک پاڼې لۀ خبري چینلونو سره ملګري شئ⬇
Tel:
https://t.me/+Vy9GsPl90MY3NjVl
Web:
FB page:
https://www.facebook.com/Gaheez-News-105079805744164/