گهیځ
ګهیځ: نن چهارشنبه (د مرغومي ۲۲مه) د افغانستان د روغتیا وزارت مسلکي معین ډاکتر عبدالباري عمر وايي، لاهم نړیوال بانک په افغانستان کې د کورونا د مرکزونو د تمویل په برخه کې بیا ځلي فعالیت نه دی پیل کړی.
تر دې وړاندې نړیوال بانک تر ۲۰۲۴ میلادي کاله په هېواد کې د کورونا ناروغۍ د ټولو مرکزونو د تمویل مسوولیت پر غاړه اخیستی و.
د روغتیا وزارت مسلکي معین نن د جینوا په کلنۍ خبري غونډه کې له نړیوالو هېوادونو او سازمانونو وغوښتل چې په افغانستان کې روغتیایي برخه له سیاسي مسایلو سره ونه تړي او د دې برخې د تمویل لپاره خپلو مرستو ته دوام ورکړي.
نوموړي همدارنګه په هېواد کې د داسې روغتیایي نظام پر جوړېدو ټینګار وکړ چې هېوادوال نور بهرنیو هېوادونو ته د تګ لپاره اړ نه شي.
هغه له دیني عالمانو هم وغوښتل چې د روغتیایي نظام او سیسټم په جوړېدو کې ورسره مرسته وکړي او په اوسني کرونایي حالت کې خلکو ته عامه پوهاوی ورکړي.
