گهیځ
پداسې حال کې چې تر لسو ورځو زیاتې وشوې چې د اسلام آباد ادارې پرته له قانع کوونکي دلیل څخه د تورخم دروازه د هر ډول تلو راتلو پر مخ تړلې، رسنیز راپورونه وایي چې د دروازې بندښت او ورسره د دواړو لوریو د پوله ساتو ځواکونو تر منځ د نښتو له امله سوداګرو او باروړونکو موټرو ته اجازه نه ورکول کېږي چې خپلو موخو ته سفر ته ادامه ورکړي.
لویدیځواله رسنۍ راپور ورکوي چې له ۵۰۰۰ ډېرې پر سوداګریزو توکیو بار لارۍ د تورخم دروازې دواړو غاړو ته ولاړې دي سوداګر او د دغه لاریو چلونکي اندېښنه لري چې د سبو او میوو په ګډون به ډېر هغه توکي چې باید پر وخت ځای ته ورسول شي، د دې ځنډ او خنډ له امله زیان وویني او خپل ارزښت به له لاسه ورکړي.
همدارنګه په ورته وخت کې د خیبر د سوداګرۍ خونې مشر یوسف اپریدي خبریالانو ته څرګنده کړې چې یوازې همدا ځل د تورخم لارې تړل کېدو سوداګرو ته لس میلیونه ډالره زیان اړولی دی او زیاته کړې یې ده چې که لار همداسې تړلې پاتې شي د دغه زیان کچه به لا نوره هم زیاته شي.
دا لومړی ځل هم ندی چې د اسلام آباد واکمن پرته له کوم دلیل نه د دواړو هېوادو تر منځ د تلو راتلو دا لار په یو اړخیز ډول تړي او دا ځل ورسره د پاکستاني ملیشو ډزې او د جګړې اور ته لمن وهل هم ملګري دي.
د رسنیزو راپورونو له مخې د روانې اونۍ په دوشنبې ورځ( د روږان زېږدیز کال د مارچ په درېیمه) کله چې پاکستاني لورې ونشوای کولای د دروازې د تړلو له لارې خپلې موخې ترلاسه کړي یا د افغانستان لوری تر خپل اغېز او فشار لاندې راولي نو ناببره او پرته له دلیل څخه یې په همدې تورخم کې د جګړې اور بل کړ او ناڅاپه یې ډزې پیل کړې خو بیا یې هم له رسوا ماتې او ځاني تلفاتو پرته بل څه ترلاسه نشو کړای.
اسلام آباد د خپلو دا ډول کړنو او پارونکو اقداماتو لپاره تل یوه بهانه لري چې ګواکې د دوی وسله وال مخالفین د افغانستان له پولو او د ډیورند استعماري کرښې په امتداد، د دوی د ملیشو او پوځ پر مرکزونو بریدونه کوي او دوی هم د همدغه مخالفینو د ټکولو لپاره یا پر ګډه پوله د افغانستان پر پوله ساتونکیو ډزې کوي یا نو چې بل څه یې له وس او توان څخه پوره نشي، د تلو راتلو لار بندوي او د دواړو هېواد سوداګرو او بار وړونکيو موټرو ته مالي زیان رسوي.
بل خوا د اسلام آباد چارواکي هڅه کوي هلته د کلونو څخه د مېشتو افغان کډوالو د ځورنې او دې خواته د جبري راستونې له لارې هم پر کابل فشار واچوي او خپلې ناروا غوښتنې پرې ومني.
د اسلام آباد د پوځي او ملکي چارواکیو دغه استدلال او بې ځایه تورونه پدې دلیل هم چاته د منلو وړ ندي چې یوې خواته د اسلام آباد دغه چارواکیو د تاریخ په اوږدو کې هېڅ کله د افغانستان له هېڅ حکومت سره ښې اړیکې ندي درلودلې او که په کابل کې د چارو واګې له هر چا او هرې ډلې سره وي دوی یې په مخالفت کې ودرېږي.
بل اړخ ته د افغانستان خلک او تاریخ دا نشي هېرولای چې اسلام آباد په درې لسیزې وړاندې پر افغانستان د امریکا او اروپایي هېوادو د ګډ یرغل پر وخت، یرغلګرو ته اوږه ورکړه خو وروسته یې دلته د امریکا او اروپا تر ملکي او پوځي سیوري لاندې له جوړ شوي حکومت سره هم ترسره نکړه او هلته هم د دواړو هېوادو تر منځ تاو تریخوالی همداسې شته و لکه دا نن.
ځکه نو د چارو د شنونکو دا نظریه حقیقت ته نژدې ښکاري چې که په کابل کې هرڅوک واکمن شي او حکومت له هرې ډلې سره وي، اسلام آباد یې تر هغه پورې نشي زغملای چې د دوی ناروا او یو اړخیزه غوښتنې او اوامر ونه مني.
د اسلام آباد دا استدلال چې د ډیورند کرښې دې غاړه د دوی وسله وال مخالفین د دوی پر پوځي مرکزونو او پوستو بریدونه کوي نو ځکه د دوی اړیکې تل له افغانستان سره ترینګلې دي، پدې هم ډېر د منلو وړ ندی چې همدا اوس په بلوچستان کې د اسلام آباد مخالفین هره ورځ وسله وال بریدونه کوي او نژدې ده چې د ټول بلوچستان واک او اختیار په خپل لاس کې ونیسې، پداسې حال کې چې دوی یې هم په مخنیوي کې ناکام دي او هم د لاس پاکولو لپاره چاته ګوته نشي نیولای.
دا او دې ته ورته په سل هاوو نور دلیلونه شته چې پر افغانستان باندې د اسلام آباد پرله پسې تاخت او تاز تر شا نورې موخې لري، او دلته نور شوم پلانونه دي، دا یوازې یوه بهانه ده چې دوی دلته د خپلو پرله پسې بریدونو او تیریو لپاره په خوله نیولې او تل یې زمزمه کوي. والسلام
ـــــــــــــــــــــــ
د نورو تبصرو او خبرونو لپاره زموږ له ټلیګرام، ویب سایټ او د فېسبوک پاڼې له خبري چینلونو سره ملګري شئ⬇️
Telegram:
https://t.me/+Vy9GsPl90MY3NjVl
Web:
FB page:
https://www.facebook.com/Gaheez-News-گهیځ-نیوز-۱۰۵۷۷۲۲۹۹۲۸۴۹۰۳/