گهیځ
ګهیځ نیوز: نن سې شنبه (د وري ۲۳مه او د اپرې ۱۲مه نېټه ده) د جمهوریت پر مهال د ملي امنیت ویاند رحمت الله اندړ وايي، په افغانستان کې د هیڅ ډول جګړې پلوی نه دی.
هغه پر خپل ټویټر لیکلي، هر خوځښت او مقاومت چې له بهره یې ملاتړ کېږي، نه د افغانستان په ګټه دی او نه هم د هېواد د کشالې د هواري لاره ده.
اندړ په ښکاره نه دي ویلي چې دا خبرې یې ولې او چا ته کړي خو تېره ورځ د پخواني حکومت د پوځ یوه جنرال سمیع سادات ویلي و، چې له هېواده بهر پاشل شوی پوځ راټولوي او د اوسني حکومت پر وړاندې د وسله والې مبارزې چمتوالی نیسي.
د ا.ا.ا چارواکو یې په ځواب کې ویلي و، چې د سادات څرګندونې په هیڅ ډول غبرګون نه ارزي. په وینا یې ځکه چې هیڅ نشي کولی.
د رحمت الله اندړ بیا وايي، که اوسنی حکومت څوک جګړې ته اړ نه کړي په مقابل کې یې جګړه هیڅ معقولیت نه دی.
