گهیځ
کابل/ګهیځ: نن سې شنبه(د تلې/میزان ۱۹مه او د اکټوبر میاشتې ۱۱مه نېټه ده) د افغانستان د صنعت او سوداګرۍ وزارت چارواکي وايي، له ایران سره یې افغانستان ته د اوبلن ګازو د واردولو په اړه خبرې کړې دي.
د یاد وزارت سرپرست وزیر نورالدین عزیزي تېره ورځ د اوبلن ګازو له واردوونکو سره په ليدنه کې ویلي، هڅه کوي چې د راتلونکي ژمي پر مهال د ګازو د بيو د لوړېدو مخنیوی وکړي.
له سوداګرۍ وزارت څخه په خپره شوې خبرپاڼه کې د سرپرست وزیر له قوله ویل شوي، چې په دې اړه يې د افغانستان لپاره د ايران د ولسمشر له ځانګړي استازي حسن کاظمي قمي سره د ګازو او نفتو د واردولو په اړه خبرې کړې دي.
د سرچینې د معلوماتو له مخې، قمي په دغو خبرو کې ډاډ څرګند کړی چې ایران به له افغانستان سره د اوبلن ګازو د واردولو په برخه کې همکارۍ ته دوام ورکړي.
عزيزي له سوداګرو غوښتي، تر څو له ايران څخه د ګازو او له روسيې څخه د نفتو او ګازو د واردوونکو شرکتونو نوملړ ترتيب او ده ته يې و سپاري.
دا په داسې حال کې ده، چې د افغانستان سرپرست حکومت له دې وړاندې له روسیې سره د نفتي او خوراکي توکو د پېرلو یو کلن قرارداد لاسلیک، چې وروسته بیا د سوداګرۍ او پانګونې خونې مدیره پلاوي غړي خانجان الکوزي وویل، چې دا قرارداد به کال وروسته دایمي شي.
