گهیځ
کابل/ګهیځ: نن شنبه (د تلې/میزان دوهمه او د سپټمبر میاشتې ۲۴مه نېټه ده) تېره ورځ (د تلې لومړۍ) د کابل د لسمې حوزې اړوند سیمه کې د وزیر اکبر خان جومات مخې ته په داسې حال کې چې خلک له لمانځه وروسته په خپرېدو وو، چاودنه وشوه.
د کابل د امنیه قوماندانۍ ویاند خالد ځدراڼ وايي، د جومات مخې ته د ولاړ موټر له امله، چې چاودېدونکي توکي په کې ځای پر ځای شوي وو، چاودنه را منځ ته شوې.
د ځدراڼ په وینا، پېښه کې ۷ تنه ولسي وګړي وژل شوي او ۴۱ نور ټپیان دي خو د پېښې دعیني شاهدانو په باور، ښايي مرګ ژوبله تر دې لوړه وي.
امنیه قوماندانۍ یو ځل بیا د پېښې د عاملینو د نیولو ژمنه کړې او وايي چې، امنیتي بنسټونه یې د پیدا کولو لپاره لاس په کار شوي دي.
د نړیوالو رسنیو د راپورونو له مخې دا په تېرو پنځوو ورځو کې درېیمه چاودنه ده، چې په کابل ښار کې رامنځ ته کېږي خو د دهمزنګ او خیرخانې سیمې اړوند له رامنځ ته شویو چاودنو کره جزیات خپاره نه شول.