گهیځ
ګهیځ: نن شنبه (د مرغومي ۱۸مه) د ترکمنستان د بهرنیو چارو وزارت مرستیال د یو تخنیکي پلاوي په مشرۍ د ټاپي پروژې د بحث لپاره لومړی هرات او نن کابل ته راغلی.
په کابل کې د ترکمني پلاوي د لیدنو په اړه جزیات نشته خو د هرات د سوداګرۍ او صنعت خونې د یوې خبرپاڼې په خپرولو سره ویلي چې یاد پلاوي دوی سره د ټاپي پروژې د کار پر چټکتیا خبرې کړي دي.
په دغې خبرپاڼه کې ویل شوي چې له ترکمنستانه له راغلي پلاوي سره د یاد هېواد ټاپي پروژې مشر هم ملتیا کوي.
سرچینه زیاتوي، د ترکمنستان د بهرنیو چارو مرستیال ویلي، د دې پروژې لپاره مهم څیز امنیت دی چې اوس په افغانستان کې امنیت راغلی دی، نو ترکمنستان کې د یادې پروژې کار بشپړ شوی او افغانستان کې به هم پیل شي.
ترکمني پلاوي په افغانستان کې له پخوا د ښه امنیت په تړاو افغان چارواکو ته د دې پروژې د ښه پلي کېدو ډاډ ورکړی.
افغان چارواکو هم د تخنیکي چارو په برخه کې له ترکمنستانه د همکارۍ غوښتنه کړې او ویلي یې دي، هغه لوژیستکي شرکتونه چې غواړي دې برخه کې کار وکړي، د کار زمینه به ورته برابره شي.
د ټاپي پروژه په ۲۰۱۸م زیږدیز کال کې د افغانستان، ترکمنستان، پاکستان او هند مشرانو له خوا پرانیستل شوه.
د دغې پروژې له لارې به ګاز او برېښنا له ترکمنستانه افغانستان بیا پاکستان او له هغه هېواده، هندوستان ته ولېږدول شي.
