گهیځ
ګهیځ نیوز: نن یکشنبه (د غبرګولي یا جوزا ۱۵مه او د جون میاشتې ۵مه نېټه ده) د کندهار ځايي چارواکي وايي، چې دې ولایت کې تولید شوې او پروسس شوې پنبه په لومړي ځل ایران او ترکیې هېوادونو ته استول شوې.
چارواکي زیاتوي، چې د کندهار د صنعت او کانونو په برخه کې هم یو شمېر بهرنیو پانګوالو پانګونې ته لېوالتیا ښودلې ده.
د کندهار په صنعتي پارک کې د ۱.۳ میلیونه ډالرو په لګښت د پنبې د پروسس فابریکه جوړه شوې چې اوس مهال ۵۰ تنه په کې کار کوي او د ورځې ۳۰ ټنه تولید لري.
د دې فابريکې مشر حاجي عصمت الله وايي، چې په هېواد کې له کرل شوې پنبې څخه سوچه پنبه، کنجاړه او غوړي توليدېږي.
د هغه په وينا، د افغانستان توليد شوې پنبه اوس پر پاکستان سربېره ايران او ترکيې ته هم صادرېږي، خو بانکي ستونزې يې پر وړاندې ډېر خنډونه جوړوي.
