گهیځ
یکشنبه، د لړم ۱۵مه
کابل/ګهیځ
د روغتیا نړیوال سازمان په افغانستان کې د ماشومانو د (پولیو) ناروغۍ پر وړاندې بریا نړیواله بریا بللې او د محو کېدو په اړه یې د هڅو له ګړندي کېدو خبر ورکوي.
دغه سازمان نن یکشبنه (د لړم ۱۵مه) پر خپله ټویټر پاڼه دا څرګندونې کړي او ویلي یې دي چې، د نړۍ په یو ګوټ کې د دغې ناروغۍ شتون د ټولو ځایونو لپاره ګواښ دی.
دغه سازمان ټینګار کړی دی چې د نړۍ یو شمېر هیوادونه له پولیو څخه پاک اعلان شوي، خو وايي چې د برتانیې او امریکا متحده ایالتونو په ګډون ځینو هیوادونو کې دغه ناروغي پيژندل شوې ده.
د روغتیا نړیوال سازمان زیاته کړې چې افغانستان اوس مهال د پولیو ناروغۍ محوه کېدو په درشل کې دی او زیاته کړې ده چې دغه سازمان به له نورو نړیوالو سازمانونو سره په ګډه په دغه هیواد کې د پولیو ناروغۍ مخنیوي په برخه کې ګډو هڅو ته دوام ورکړي.
د یادولو وړ ده، چې سږ کال تر دا مهاله په افغانستان کې د پولیو یوازې دوه پېښې ثبت شوې دي.
دا په داسې حال کې ده، چې د ملګرو ملتونو د ماشومانو د ملاتړ صندوق (يونیسف) د معلوماتو له مخې لا هم په نړۍ کې ۱۸ میلیون ماشومانو د پولیو ضد واکسین نه دي تر لاسه کړي، یاد سازمان ویلي ترڅو چې دغه ماشومان واکسین تر لاسه نکړي، تر پنځه کلنۍ کم عمره ماشومانو کې د یادې روغۍ پیدا کېدو وېره شته.
