گهیځ
یکشنبه، د لړم ۱۵مه
کابل/ګهیځ: د رپوټونو له مخې، د امریکا د کانګرس یوه غړي پر نړیوالې ټولنې په ځانګړي ډول پر امریکا نیوکه کړې، چې ولې یې د افغانستان له سرپرست حکومت سره تعامل نه دی کړی.
د کانګرس غړي پیټر مایر د افغانستان د سرپرست حکومت د رسمیت پېژندنې په تړاو وايي، حاکم نظام یو حکومت دی او په دغه هېواد کې بل حکومت نشته، نو امریکا ته په کار ده چې و یې مني.
هغه دغه راز ویلي، که چېرې د افغانستان سرپرست حکومت د بشري حقونو په برخه کې مثبت ګامونه پورته کړي او نجونو ته د ښوونځیو د تګ اجازه ورکړي، د رسمیت پېژندو چاره به اسانه شي.
مایر ټینګار کړی، چې د سرپرست حکومت د رسمیت پېژندلو لپاره د بشري حقونو او د نجونو د زده کړو په تړاو پرمختګونو ته اړتیا ده.
نوموړي د امریکا او د افغانستان د اوسني حکومت تر منځ اړیکو ته په کتو ویلي، که د نظر بېلوالی رامنځته شي او د دواړو لورو قناعت ترلاسه نه شي؛ نو دغه چاره به بدې پایلې ولري.
دا په داسې حال کې ده، چې افغان حکومت په وار وار د اسلامي اصولو مطابق ښځو ته د هغوی د حقونو ورکولو ته د ژمنتیا ادعا کوي، خو نړیوال په ځينو وزارتونو او ادارو کې پر دندو بوختې ښځې له کاره بې برخې کول او تر شپږم ټولګي پورته د نجونو پر مخ د ښوونځیو تړل د بشري حقونو په ځانګړي ډول د ښځو حقونو ته نه درناوی بولي، چې د دوی په وینا د رسمیت پېژندو پر وړاندې خنډونه جوړوي.
د یادولو وړ ده، چې د ا.ا حکومت استازي له شپږم ټولګي پورته د نجونو د ښوونځیو د پرانستو تکراري ژمنې کړي خو په دې برخه کې تر اوسه کوم مثبت ګام نه دی اخیستل شوی.
