گهیځ
ګهیځ نیوز: نن سې شنبه (د وري ۱۶مه او د اپرېل ۵مه نېټه ده) د افغانستان پخواني ولسمشر حامد کرزي په دغه هېواد کې د اروپایې ټولنې د سفیر له مرستیال آرنوټ پاویلز سره وکتل.
پاویلز پخواني ولسمشر ته هغه اعلامیه وسپارله، چې د اروپايي ټولنې له خوا ورکړل شوې وه.
د اروپایي ټولنې په دغې اعلامیه کې په افغانستان کې د نجونو د ښوونځیو د سملاسي پرانیستلو غوښتنه شوې.
د غوښتنې سر بېره په دې اعلامیه کې د نجونو د زده کړې پر اړتیا او په معناداره توګه په ټولنه کې د ښځو د هراړخیز رول په اړه یادونه شوې.
حامد کرزي د اروپایي ټولنې د اعلامیې هرکلی کړی او په هېواد کې یې د نجونو د ښوونځیو پر بېړني خلاصون ټینکار وکړ.
تمه وه چې د وري په دریمه د نجونو پر وړاندې له لومړي تر دولسم ټولګي ټول ښوونځي پرانستل شي، خو د اسلامي امارت چارواکي وايي، چې په دې تړاو د دوی طرحه لا وروستۍ شوې نه ده.
د دوی په وینا د طرحې له وروستۍ کېدو وروسته به ټول ښوونځي د نجونو پر مخ پرانستل شي.
