گهیځ
کابل/ګهیځ: نن چهارشنبه (د تلې/میزان ۱۳مه او د اکټوبر ۵مه نېټه ده) د ترانسپورټ او هوايي چلند وزارت وايي، چې د عربي متحده اماراتو له یوې کمپنۍ سره یې د افغانستان هوايي چلند درېیو لویو برخو کې لوی قرادادونه لاسلیک کړي دي.
دا قراردادونه له ګانوم شرکت سره د ځمکنیو خدمتونو، فضايي امنیت او د هېواد په کچه د لویو هوايي خدمتونو په برخه کې شوې دي.
د ملي راډیو ټلویزیون د راپور له مخې د هوايي چلند وزارت ویاند امام الدین احمدي ویلي، چې د یادو قراردادونو پر مټ به د هوايي چلند خدمتونه بنسټیز او معیاري کړي او تر څنګ به یې افغانستان د تخنیکي کسانو په روزلو کې پر ځان متکي شي.
احمدي ویلي، چې د قرارداد له مخې ټاکل شوي کسان به د روزونکو په توګه افغانستان ته راځي او په دې برخه کې به افغانان روزي، د نوموړي په خبره که بهر ته د تلو اړتیا پېښه شي دا چاره به هم کوي.
وزارت وايي، چې په دې سره به له افغانستانه عبوري الوتنې هم ډېرې شي.
