گهیځ
کابل/ګهیځ: نن شنبه (د تلې/میزان ۱۶مه او د سپټمبر ۸مه نېټه ده) د کانونو او پټروليم وزارت څرګندوي، چې د هرات ښار له صنعتي پارکونو څخه د ټاپي پروژې د ګازو د وېشلو طرحه چمتو شوې ده.
باختر دولتي خبري اژانس په یوه راپور کې د کانونو وزارت د ویاند عصمت الله برهان له قوله ویلي، چې د دغه وزارت مسلکي معين انجينر وحيدالله حليمي د يوه پلاوي په مشرۍ ترکمنستان ته رسېدلی او د ټاپي پروژې پر وړاندې د خنډونو او شته ستونزو د لرې کولو پر سر له ترکمنستاني لوري سره پر خبرو بوخت دي.
برهان زیاته کړې: “ترکمنستان ژمنه کړې چې د ښاري ګازو د شبکې او د هرات صنعتي پارک په جوړولو کې همکاري کوي او د دواړو لوریو تخنيکي ټيمونه به ډېر ژر کار پيل کړي “.
د رییس الوزراء اقتصادي مرستيال ملاعبدالغني برادر د تلې په ١١مه په هرات کې له سوداګرو او پانګه والو سره په کتنه کې ويلي و، چې د ټاپي سترې پروژې له امتيازونو به لومړى د هرات خلک ګټه واخلي.
د ټاپي پروژې په بشپړېدو سره د ترکمنستان ګاز د افغانستان له لارې پاکستان او هندوستان ته لېږدول کېږي، چې د نل ليکې او تاسيساتو د جوړولو کار یې په ترکمنستان کې پيل شوى او د افغانستان تر پولې پورې را رسېدلى دى.
