گهیځ
کابل/ګهیځ:
نن شنبه (د لړم/عقرب ۷مه او د اکټوبر میاشتې ۲۹مه نېټه ده) د روغتیا نړیوال سازمان راپور ورکړی چې په افغانستان کې د شري او شدید اسهال له امله ۴۵۲ کسانو خپل ژوند له لاسه ورکړی دی.
د روغتیا نړیوال سازمان په تېرو لسو میاشتو کې د شري پر ناروغۍ د مړیو شو کسانو شمېر ۳۷۸ تنه ښودلی او وايي، چې د روان کال په وروستۍ میاشت کې ۷۶ تنه سخت اسهال مړه کړي دي.
دغه سازمان پرون ماښام (جمعه د تلې۶مه) د یوه نوي راپور په خپرولو سره په افغانستان کې د شري او سخت اسهال د دوو ناروغیو د خپریدو اعلان وکړ.
د روغتیا نړیوال سازمان د راپور له مخې، د روان کال له جنورۍ څخه د اکټوبر تر ۲۲مې په افغانستان کې د شري ۹۰، ۷۱ مثبتې پېښې ثبت شوې چې له دې ډلې یې ۳۷۸ کسان مړه شوي دي.
د دغو ناروغیو ډېری قربانیان له پنځو کلونو کمعمره ماشومان دي.
دغه سازمان په خپل راپور کې لیکلي، چې د شري ناروغۍ ټول افغانستان اغېزمن کړی، خو د بدخشان، کابل، ننګرهار، کندز، هلمند، تخار او هرات ولایتونه تر ټولو ډېر زیانمن شوي دي.
شدید اسهال یوه بله ناروغي ده چې په افغانستان کې یې د خپریدو په اړه د روغتیا د نړیوال سازمان په راپور کې یادونه شوې ده.
د دې ناروغۍ لامل د اوبو کموالی بلل کېږي.
د روغتیا نړیوال سازمان د راپور پر بنسټ، د افغانستان په ۳۴ ولایتونو کې په ۱۵۳ ولسوالیو کې د شدید اسهال ناروغۍ پېښې ثبت شوې دي.
داسې اندېښنې شته چې د شري او شدید اسهال له امله ښايي په افغانستان کې د مړو شمېر زیات شي.