گهیځ
ګهیځ: نن دوشنبه (د مرغومي ۲۰مه) د کورنیو چارو وزارت وایي چې د ټاپي پروژې پر وړاندې هیڅ راز امنیتي خنډ نه شته دی خو د دغې پروژې د ښکېلو هېوادونو د ډاډ لپاره یوه ځانګړې امنیتي قطعه جوړوي.
د یاد وزارت په وینا، د دې قطعې د رامنځته کېدو پر طرحه کار پیل شوی او ژر به یې کارونه پای ته ورسېږي.
د وزارت ویاند سعید خوستي ویلي چې دغه قطعه به د ټاپي پروژې د پلي کېدو په ساحو کې د امنیت ساتنې دنده پر غاړه ولري. خوستي زیاته کړې ده چې د کورنیو چارو او دفاع وزارتونو تر څنګ د استخباراتو عمومي ریاست د ټاپي پروژې د امنیت د ټينګښت په تړاو ترکمنستان ته ډاډ ورکړی دی.
د یادونې ده چې د کانونو وزارت هم ویلي چې اسلامي امارت واک ته تر رسېدو مخکې هم د ګازو د نل لیکې د امنیت په تړاو ترکمنستان ته ډاډ ورکړی و، اوس هیڅ ډول ستونزه نشته او دغه پروژه باید هر څه ژر پیل شي.
