د طالب حکومت دوه ګونې تګلاره

لیکوال: م. ذهین
دې وروستیو کې د افغانستان په ګڼو برخو کې د مرموزو وژنو راپورونه پراخ شول.
د پخوانیو چارواکو او طالب ضد شخصیتونو وژنې د ټولنې په منځ کې زیاتې اندېښنې او سرګردانۍ رامنځته کړې. دغه وژنې د یوې کړکېچناکې او تضاد ډکې تګلارې انعکاس دی.
په داسې حال کې چې طالبان له یوه پلوه نړیوالو محافلو کې د عامه عفوې او بخښنې خبرې کوي، بل لور بیا په مخفي توګه دغه ډول مرموزو وژنو ته زور ورکوي.
طالبانو چې په پیل کې د افغانستان د امنیتي وضعیت د ښه کولو وعدې وکړې او پر دې یې ټینګار یې وکړ، چې دوی به د جګړې د ټولو لورو پر وړاندې عفوې ته توجه وکړي، په عمل کې د خپل قدرت تثبیت لپاره داسې کړنې ترسره کړې، چې د هغو خلکو ژوند یې په خطر کې واچاوه.
پخوانۍ عسکر او طالب ضد شخصیتونه چې د طالبانو له واکمنۍ سره مخالف وو، د مرموزو وژنو هدف شول.
دا مرموزې وژنې د طالبانو د جګړې د اصولو او د هغوی د شوې ژمنې سره ټکر کوي. که څه هم طالبان په علني ډول د عفوه چغې کوي، خو په بل لور کې دوی د خپلو مخالفینو د ځپلو لپاره په خفيه توګه خونړۍ کړنې ترسره کوي.
دا ډول کړنې د سولې، وحدت او پرمختګ پر ځای، د بې اعتمادي او ګډوډۍ لامل ګرځي.
د دې وژنو تر شا داسې یو پیچلی سیاست شتون لري، چې په ښکاره ډول د افغانستان راتلونکې ته د یوې سالمې او باثباته ټولنې جوړول په خطر کې اچوي.
د مرموزو وژنو پر وړاندې دغه دوه ګوني تګلاره، په ټوله کې د افغانانو ترمنځ بې اعتمادي، ترور او وحشت زیاتوي. په داسې شرایطو کې چې ټولنیز باور او اعتماد باید د یوې نوې حکومتي ادارې لپاره بنسټیز اصل وي، طالبان د دې پر ځای د خپلو مخالفینو د ځپلو لپاره د زور او وحشت له لارو چارو څخه ګټه اخلي.
دې عمل د اسلامي ارزښتونو پر ځای د نظامي تشدد او طاقت پر مخ تللې کړنلاره غښتلې کړې ده.
د دې تر څنګ، د مرموزو وژنو د پراخېدو سره، داسې ښکاریږي چې طالبان خپلې ژمنې د عدالت، انصاف او سولې په اړه یوازې د کاغذ پر سطحه پاتې کړي. که د دوی دا دوه ګونې تګلاره ادامه پیدا کړي، نو په افغانستان کې د سولې او امنیت رامنځته کول به یوازینۍ هیلې او خوشبینۍ ته یو سراب بدل شي.
پای

ــــــــــــــــــ
ګهیځ نیوز تاسې ته د هېواد له کونج – کونج او د نړۍ له بېلابېلو برخو ورځني، مهم او تازه خبرونه، راپورونه، مرکې او تبصرې د دقت په پام کې نیولو سره په چټک ډول وړاندې کوي.
ګهیځ نیوز، د اطلاع رسونې باوري سرچینه
زموږ خبري ادرسونه👇
Telegram:
https://t.me/+Vy9GsPl90MY3NjVl
twitter:
Tweets by GaheezAgency
Web: