گهیځ
د افغانستان بانک وايي، د دغه هیواد د بانکي نظام فعالیتونه به ډېر ژر عادي حالت ته ور وګرځي او د بهرنیو اسعارو پر وړاندې د افغانیو «ثبات» به وساتل شي.
د افغانستان بانک داسې مهال دا څرګندونې کوي چې په دې وروستیو کې د ډالرو پر وړاندې د افغانیو بیه تر ټولو ټيټي کچې ته رسېدلې ده.
یاد بانک نن دوشنبه د لړم په ۲۴مه پر خپله ټویټرپاڼه لیکلي چې د پولي سیاست پلي کېدا ته ژمن دي او ټاکل شوې په دې برخه کې یو لړ چارې هم سر ته ورسوي.
د افغانستان بانک خبر ورکړی چې د یادو هڅو په لړ کې به سبا سې شنبه اسعار لیلام کړي.
ورته مهال باختر دولتي خبري آژانس ویلي چې سبا به د افغانستان بانک ۱۰ میلیون ډالر په بازار کې وپلوري.
د افغانستان بانک د یاد کار موخه د اسعارو په بازار کې د بهرنیو اسعارو په وړاندې د افغانیو ثابت پاتې کېدل بللي دي.
د راپورونو له مخې په روانه اونۍ کې یو امریکايي ډالر په افغانستان کې له ۹۳ تر ۹۵ افغانیو پورې رسېدلی و.
