گهیځ
دوشنبه، د لړم ۱۶مه
کابل/ګهیځ: د قرغيزستان د ولسمشر ځانګړي استازي د سرپرست حکومت له مرستيال سره په کتنه کې د ښځو حقونو د ټينګښت او سياسي جوړښت په اړه خپلې سلا مشورې او وړاندیزونه مطرح کړي دي.
د ارګ په ټویټرپاڼه کې راغلي چې د رییس الوزراء اداري مرستیال د قرغيزستان د ولسمشر ځانګړي استازي طلعت بېک مصدقاف په مشرۍ پلاوي سره کتلي دي.
که څه هم د ارګ په خبرپاڼه کې د دغو وړاندېزونو په اړه په څرګند ډول څه نه دي ویل شوي خو زیاتوي چې، طلعت بېک مصدقاف په افغانستان کې د سراسري امنيت په ټینګښت خوښي ښودلې او د ښځو حقونو د تامين او سياسي جوړښت په اړه يې خپلې مشورې او وړاندیزونه مطرح کړي دي.
د خبرپاڼې له مخې، د قرغيزستان د ملي امنيت دولتي کمېټې غړي بالات سيپاف او په کابل کې د قرغيزستان سفارت شارژدافیر سنجر الكاژايوف لـه ترورېزم او نشه يي توکو سره د مبارزې په برخه کې د همکاريو ډاډ ورکړی او ویلي یې دي، چې ګاونډي او د سيمې هېوادونه بايد د افغانستان واقعي غږ واوري.
افغان چارواکي د نړیوالو او سیمو هېوادونو ځینو اندېښنو ته، چې ګواکې له افغانستانه د ترهګرو ډلو د فعالیت ګواښ موجود دی، په اشارې وویل، هېڅ وسله والې ډلې ته په خپله خاوره کې د فعالیت اجازه نه ورکوي.
