گهیځ
کابل/ګهیځ: نن یکشنبه (د لړم/عقرب لومړۍ نېټه او د اکټوبر میاشتې ۲۳مه نېټه ده) د افغانستان د بهرنیو چارو وزارت وايي، داسې معلومات یې تر لاسه کړي چې په ویرجنیا ایالت کې د امریکا د سمندري ځواک عسکر «جوشوا ماسټ» یوه افغانه ماشومه یرغمل او د خپلې کورنۍ د غړې په توګه له ځان سره ساتلې.
د دغه وزارت په خبرپاڼه کې راغلي، دا هغه افغان ماشومه ده چې په افغانستان کې د جګړو پر مهال یې ټوله کورنۍ د امریکا په بمبارۍ کې له لاسه ورکړې ده.
په خبرپانه کې ښودل شوي، چې دغه ماشومه یې له نورو خپلوانو په زوره برمته شوې ده.
د ا.ا د بهرنیو چارو وزارت دا چاره د اندېښنې وړ او له انساني کرامته لرې بللې او زیاتوي، چې یاده موضوع به له امریکايي چارواکو سره په جدي ډول تعقیب کړي څو یاده ماشومه بېرته خپلې کورنۍ ته وسپارل شي.
که څه هم وزارت په څرګند ډول نه دي ویلي، خو ښايي دغه ماشومه له خپلو خپلوانو سره د امریکا لخوا د تخلیې پر مهال له افغانستانه ویستل شوې وي.
وزارت دا هم ویلي، د کوچنیانو او مېرمنو په ګډون هغه لسګونه زره افغانان چې امریکا او شریکانو یې په نا مناسب ډول له افغانستان ه ویستلي، له انساني حقونو بې برخې او په پنډغالو کې ساتل کېږي.
دوی وايي، امریکا دې د کډوالو نړیوال قانون او قونسلي خدمتونو له مخې افغان کډوالو ته انساني حقونه ورکړي.
دا په داسې حال کې ده، چې د جمهوریت د سقوط او کابل ته د ا.ا په راتګ سره امریکا او شریکانو یې لسګونه زره افغانان مختلفو درېیمګړو هېوادونو ته واستول، چې له هغه ځایه به یې په نوبت خپلو هېوادونو ته یوسي خو ګڼ شمېر دغه کسان بې برخلیکه په پنډغالو کې پراته او د ژوند له لومړنیو انساني حقونو څخه بې برخې دي.
