گهیځ
ګهیځ نیوز: نن سې شنبه (د وري ۱۶مه او د اپرېل ۵مه نېټه ده) د امریکا متحده ایالتونو د نشه يي توکو د کښت د مخنیوي په اړه د افغان حکومت د تازه فرمان هرکلی کړی دی.
د افغان حکومت په تازه صادر شوي فرمان کې راغلي چې له دې وروسته په ټول افغانستان کې د نشه يي توکو په تېره بیا د کوکنارو کرکېله او کاروبار بند دی.
د افغانستان لپاره د امریکا د سفارت شارژدافیر ان مککري ویلي د افغان حکومت له لوري د نوي خپاره شوي فرمان هرکلی کوي خو تمه یې ښودلې چې دغه فرمان عملي شي.
د ده په خبره نشه يي توکي د افغانستان، سیمې او نړۍ لپاره خطرناک دي نو له همدې امله دی تمه لري چې د نشه يي توکو د کښت د مخنیوي په موخه صادر شوی فرمان په بشپړه توګه عملي کړل شي.
ان مککري دغه راز ویلي چې افغانان د بزګرۍ په برخه کې مرستو ته اړتیا لري او په خبره یې افغانان اړ دي چې یو پیاوړی زراعتي سیستم ولري.
د افغان حکومت د فرمان له مخې، که څوک د کوکنارو او ورته بوټو کښت وکړي، کښت به یې له منځه ځي او سرغړوونکي سره به قانوني چلند کېږي.
