گهیځ
کابل/ګهیځ: نن شنبه (د لړم/عقرب ۷مه او د اکټوبر میاشتې ۲۹مه نېټه ده) د ازبکستان ولسمشر شوکت میرضیایوف د اروپايي کمېسیون له رییس شارل میشل سره په کتنه کې د افغانستان په روان وضعیت خبرې کړې دي.
د میشل او ضیایوف تر منځ یاده کتنه تېره ورځ جمعه (د لړم ۶مه) شوې. د دغې کتنې په اړه د دوی په ګډه خبرپاڼه کې راغلي، چې د افغانستان له خلکو سره د بشرپاله مرستو، په افغانستان کې د بشري حقونو خوندیتوب او د یو ټولګډونه حکومت د جوړېدو په برخه کې باید هڅې وشي.
په خپره شوې خبرپاڼه کې د ژمي په درشل کې په افغانستان کې روان بشري وضعیت د اندېښنې وړ بلل شوی او له نړیوالو مرستندویه ادارو غوښتل شوي چې د دغه هېواد له خلکو سره بېړنۍ مرستې وکړي.
دواړو مشرانو ټینګار کړی چې د افغانستان خاوره باید یو ځل بیا د سیمې او نړۍ د هېوادونو لپاره ګواښوونکې نه وي.
که څه هم د افغانستان حکومت د دوی تازه څرګندونو ته کوم غبرګون نه دی ښودلی خو له دې وړاندې یې په وار وار ډاډ ورکړی چې دوی نه پرېږدي چې د افغانستان له خاورې دې کوم هېواد ته ګواښ جوړ شي.
