گهیځ
کابل-ګهیځ نیوز(د لړم / عقرب ۷ مه نېټه)
د ګهیځ نیوز د خبر له مخې د افغانستان کرکټ الف ټيم چې ابدالیان لوبډله نومیږي، د آسیا په ایمرجینګ کپ سیالیو کې د سریلانکا الف ټیم په ماتولو سره وتوانېده، چې د دې سیالیو اتلولي په خپل نوم کړي.
په دې پایلوبه کې سریلانکا افغانستان ته د ۱۳۴ منډو هدف ورکړی و چې افغان لوبډلې په ۱۹ اوور کې د دریو لوبغاړو په سوځېدو سره یاد هدف پوره کړ.
د دغې بریا لپاره د شپې ناوخته د افغانستان په بېلابېلو سیمو کې خلک لارو – کوڅو ته راووتل او د بریا خوښي یې ولمانځله.
د ملي لوبډلې لوبغاړو راشد خان، محمد نبي او ګڼو نورو هم د مبارکۍ په پار ویډیوګانې خپرې کړي.
د افغانستان پخواني ولسمشر حامد کرزي په خپلې اېکس پاڼې د دې بریا مبارکي ورکړې او ویلي، چې افغان لوبغاړو په ټولو لوبو کې د افغانستان لپاره لاسته راوړنې کړي.
د افغان حکومت د بهرنیو چارو وزارت مرستیال شـ ـیر محمد عـ ـباس سـ ـتانکزي یو بیان کې ویلي، د افغانستان د کرکټ لوبغاړي، قهرمانان چې د سریلانکا په مقابل کې یې اتلولي خپله کړه؛ دوی ته، د کرکټ ټول ټیم او د دوی د کرکټ بورډ ټولو منسوبینو او د افغانستان ملت ته د زړه له کومې مبارکي وایم. له الله پاکه نور توفیق ورته غواړم.
د افغانستان د سولې لپاره د امریکا پخواني ځانګړي استازي زلمي خلیلزاد هم په خپله ایکسپاڼه په دې بریا خوښي ښودلې.
په ایمرجنګ کپ سیالیو کې د افغانستان، هند، سریلانکا، بنګلدېش، کوربه متحده عرب امارات، عمان، هانک کانګ او پاکستان لوبډلې شاملې وې.
که څه هم دا الف ټیمونه وو، خو اکثرو لوبډلو کې د ملي ټيمونو مهم لوبغاړي هم ولوبېدل.
ــــــــــــــــــ
ګهیځ نیوز تاسې ته د هېواد له کونج – کونج او د نړۍ له بېلابېلو برخو ورځني، مهم او تازه خبرونه، راپورونه، مرکې او تبصرې د دقت په پام کې نیولو سره په چټک ډول وړاندې کوي.
ګهیځ نیوز، د اطلاع رسونې باوري سرچینه
زموږ خبري ادرسونه👇
Telegram:
https://t.me/+Vy9GsPl90MY3NjVl
twitter:
https://twitter.com/GaheezAgency
Web:
FB page:
https://www.facebook.com/Gaheez-News-گهیځ-نیوز-۱۰۵۷۷۲۲۹۹۲۸۴۹۰۳/