گهیځ
فلسطین د آزادۍ او مبارزې اوږد تاریخ لري. په دې زرګونه کلونو قدامت کې هر ځل د اشغالګرو ستراتېژي ناکامیږي.
د هرې دسیسې پایله یې ناکامي وي. اوس بیا د صهیونستي رژیم سرلاري بنیامین نتنیاهو داسې یو وړاندیز کړی چې له بشري، تاریخي او قانوني پلوه باطل دی. دا وړاندیز د صهیونیزم د متکبرانه ذهنیت او نیواکګرانه تفکر څرګندونه کوي.
نوموړي ویلي، چې فلسطین دې په سعودي عربستان کې جوړ شي؛ ځکه د ده په ټکو سعودي پراخې شاړې ځمکې لري. دا څرګندونې د دوی له لوري اشغال ته د مشروعیت ورکولو هڅه ده. د فلسطینیانو تاریخي هویت او له خپلې خاورې سره د دوی تړاو خورا ژور دی، چې د دې انکار په افسانوي فلسفو به دا تړاو نیمګړی نشي.
د سعودي عربستان د بهرنیو چارو وزارت سمدلاسه دا څرګندونې په کلکه رد کړې او دا یې د اشغالګرو هغه افراطي ذهنیت وباله، چې فلسطین د فلسطینیانو تاریخي، وجداني او قانوني حق نه بولي او غواړي چې د زور له لارې د دوی هویت ته هم ضربه ورکړي. دا موقف په ښکاره توګه څرګندوي چې اسلامي نړۍ تر یوه بریده د فلسطین په مسأله کې په ویښېدو ده.
دا ډول نظریات یوازې د صهیونستي رژیم د مشرانو له خولې نه راوځي؛ بلکې د لوېدیځ سیاستوال یې هم ملاتړ کوي. د امریکا ولسمشر ډونالډ ټرمپ هم ویلي، چې امریکا به د غزې تړانګه کنټرول کړي او هلته به د فلسطینیانو پر ځای صهیونستانو ته ځای ورکړي. دا څرګندونې د نیواک د پراخولو او د فلسطیني ولس د هویت محوه کولو دسیسه ښيي. د فلسطینیانو د ځورولو، مهاجر کولو، د هغوی د آزادۍ حق تر پښو لاندې کولو او بالآخره غزه له فلسطینیانو څخه د اخیستلو هڅه د بشري حقونو او نړیوالو قوانینو ښکاره سرغړونه ده، خو لوېدیځ قدرتونه یې یا نه ویني او یا ورته پټه خوله پاتي.
د ترکیې ولسمشر رجب طیب اردوغان د فلسطین د مهاجرت دا پلان په کلکه غندلی او څرګنده کړې یې ده، چې هېڅوک د غزې ولس له خپل ټاټوبي نه شي وېستلی.
دا څرګندونې د فلسطیني ولس د ثبات او مبارزې لپاره یو قوي اخلاقي ملاتړ دی، چې له بل هر چا وړاندې د اشغالګرو ذهنیت ته چیلنج ورکوي. د اسلامي نړۍ نور مشران هم باید دا موضوع جدي واخلي او یوازې پر ویناوو بسنه ونه کړي؛ بلکې عملي اقدامات وکړي.
د فلسطین مسأله فقد اسلامي موضوع نه ده. دا د بشري وجدان، عدالت او د نړیوال نظام د مشروعیت یوه ستره آزموینه ده. که د نړیوالو قوانینو تر سیوري لاندې اشغالګر ته اجازه ورکول کېږي، چې یو ملت له خپلې خاورې وباسي، نو دا به د نړیوال عدالت مفهوم ته هم ضربه ورسوي؛ ځکه نن که فلسطینیان وېستل کېږي، سبا به د نړۍ هر بل ملت له ورته برخلیک سره مخ شي.
په دې حساسو شېبو کې یوازې غبرګون ښودل بسنه نه کوي. د اسلامي نړۍ مشران باید د فلسطینیانو لپاره یو عملي، مؤثر او واقعي ملاتړ ته راودانګي.
سعودي عربستان، ترکیه، ایران، قطر او نور اسلامي هېوادونه باید د فلسطین د مسألې لپاره یو موټی شي او د اقتصادي، سیاسي او نظامي لارو چارو په کارولو سره صهیونستي نیواک ته د پای ټکی کېږدي.
که اسلامي نړۍ یو موټی شي، نو نه یوازې د فلسطین د آزادۍ لاره آسانه کېدای شي؛ بلکې دا به د نیواکګرو د هر ډول راتلونکو دسیسو مخه هم ونیسي.
د تاریخ اوږدو شپو کې د اشغالګرو پر وړاندې یوازې مقاومت د آزادۍ ضامن پاتې شوی. فلسطین به یوازې د خالي شعارونو له لارې آزاد نه شي؛ بلکې دا کار د عملي ګامونو، سیاسي فشار او د اسلامي نړۍ د یووالي له لارې ممکن کېدای شي.
ــــــــــــــــــــــ
د نورو تبصرو او خبرونو لپاره زموږ له ټلیګرام، ویب سایټ او د فېسبوک پاڼې له خبري چینلونو سره ملګري شئ⬇️
Telegram:
https://t.me/+Vy9GsPl90MY3NjVl
Web:
FB page:
https://www.facebook.com/Gaheez-News-گهیځ-نیوز-۱۰۵۷۷۲۲۹۹۲۸۴۹۰۳/