گهیځ
د ملګرو ملتونو امنیت شورا وايي سبا (چهارشنبه د لړم پر ۲۶مه) د افغانستان پر وضعیت د بحث لپاره غونډه کوي.
د روسیې ټاس خبري اژانس د ملګرو ملتونو د امنیت شورا رییس له قوله ويلي، چې په دې غونډه کې به پر بشري حقونو، انساني مرستو او افغانستان ته د مرستو د رسولو پر څرنګوالي خبرې وشي.
سرچینه کاږي چې د افغانستان لپاره د ملګرو ملتونو استازې دیبورا لاینز به د دغه هېواد په استازيتوب د غونډې ګډونواله وي. په افغانستان کې د ملګرو ملتونو سازمان دفتر وايي، چې مېرمن لاینز به غونډې ته د افغانستان په اړه خپل چمتو کړی راپور وړاندې کړي.
تر دې وړاندې هم د ملګرو ملتونو بېلا بېلو ادارو د افغانستان په اړه غونډې جوړ کړي او دلته یې د دایمي سولې د راتګ غوښتنه کړې ده.
بلخوا د افغانستان اسلامي امارت بیا وار له مخه د دغه غونډې هرکلی کړی او تمه یې ښوودلې چې دلته د سولې او امنیت له راتګ سره مرسته وکړي.
دا غونډه پر داسې مهال جوړېږي چې نړیوالو بنسټونو بیا بیا په افغانستان کې په راتلونکي ژمي کې د بشري ناورین پېښدو خبرداری ورکړی.