گهیځ
کابل-ګهیځ نیوز( د جدی/مرغومی ۱۷ مه نېټه):
که څۀ هم د اټکل له مخې نن او سبا کابل کې د واورې د اورښت اټکل شوی، خو بیا هم روغتیا پالان وایي چې د هوا ککړتیا او اورښتونو د کمښت له امله موسمي ناروغۍ ډېرې شوې دي.
مرکز کابل کې د اندراګاندي روغتون ډاکټران وایي، د هوا سړېدو او چاپېریال ککړتیا له امله په ماشومانو کې د نمونیا یا سینه بغل ناروغي تر پخوا دوه برابره زیاته شوې ده.
د دغې روغتون مسوولینو له رسنیو سره په خبرو کې ویلي، چې که څه هم دوی ته د یو شمېر مرستندویو غیر حکومتي موسسو له لوري درمل ورکول کیږي، خو بیا هم د هوا ککړتیا له امله د ناروغانو شمېر دومره زیات شوی چې دوی ورته په سمه توګه رسیدګي نشي کولی.
د راپورونو له مخې د اندراګاندي په روغتون کې د نمونیا یا سینه بغل لپاره په ځانګړي شوي وارډ کې په یوه بستر باندې دوه او درې ماشومان پراته دي.
د مرکز کابل سربېره ولایاتو کې هم د هوا ککړتیا او وچکالۍ راپورونه ورکول شوي، چې لۀ امله یې نۀ یوازې د سینه او ټوخي په ګډون نورو ناروغیو سرایت کړی، بلکې د کجکي برېښنا بند په ګډون یې د اوبو ډېری زېرمې هم تشې کړې دي.
ـــــــــــــــــــــــ
د نورو خبرونو لپاره زموږ له ټلیګرام، ویب سایټ او د فېسبوک پاڼې لۀ خبري چینلونو سره ملګري شئ⬇️
Tel:
https://t.me/+Vy9GsPl90MY3NjVl
Web:
FB page:
https://www.facebook.com/Gaheez-News-105079805744164/