گهیځ
کابل-ګهیځ نیوز( د حمل/وري ۷ نېټه):
د کابل ښاروالۍ مسوولین وایي، په تېر ۱۴۰۱ لمريز کال کې يې څه باندې ۴ میلیارد او ۳۰۶ میلیونه افغانۍ عواید راټول کړي او ۱۱ سوه ۷۰ جريبه ځمکه چې د یادې ادارې اړوند وه، له غصبه راګرځولې ده.
د کابل ښاروالۍ مسوولینو نن په تېر ۱۴۰۱ لمريز کال کې د خپلو کړنو او لاسته راوړنو اړوند معلومات ورکړل.
د کابل ښاروالۍ استازي نعمت الله بارکزي ویلي، تېر ۱۴۰۱ لمريز کال کې ۴ میلیارده ۳۰۶ میلیونه ۹۷۵ زره او ۲۰۰ افغانۍ عواید د صفايي او ښاري خدمتونو له درکه ترلاسه شوي دي.
هغه زياته کړه، په ۱۴۰۰ لمريز کال کې د کابل ښاروالۍ د عوایدو کچه یو میلیارد، ۲۸۶ میلیون ۵۷۵ زره او ۳۰۳ افغانۍ وه چې د تېر او وړم کال په پرتله ۷۰ سلنه زیاتوالی ښيي او د عوایدو زياتوالي دليل د عوایدو په راټولولو کې د شفافیت ډېرښت دی.
نوموړی وايي، تېر ۱۴۰۱ لمريز کال کې ۱۱ سوه ۷۰ جریب ځمکه چې د کابل ښاروالی اړوند ده د کابل ښار په بېلابېلو ناحيو کې له غصبه راګرځولې ده او په دغه تړاو یې ۱۷ دوسیې د څېړنو په موخه لویې څارنوالۍ ته هم استولي دي.
ــــــــــــــــــــــ
د نورو خبرونو لپاره زموږ له ټلیګرام،ټویتر، ویب سایټ او د فېسبوک پاڼې له خبري چینلونو سره ملګري شئ⬇️
Tel:
https://t.me/+Vy9GsPl90MY3NjVl
twitter:
Tweets by GaheezAgency
Web:
FB page:
https://www.facebook.com/Gaheez-News-105079805744164/