گهیځ
مونږ مسلمانان هر کال د نړۍ په ګوټ ګوټ کې د قمري کال د محرم الحرام لسمه نېټه د اسلامي تاریخ د یوه مهم او نه هېرېدونکې فصل او باب په توګه یادوو، د هغې ورځې لمانځنه کوو او پدې ورځ د ظلم، له اسلامي اصولو څخه د انحراف او خپل سرۍ په وړاندې د اسلام د ستر پیغمبر د ګران لمسي حضرت حسین -رضی الله عنه- او د هغه د یارانو د ودریدو او بیا د دوی د مظلومانه شهادت یاد په بېلابېلو بڼو تازه کوو او د اسلامي تاریخ د دې سترې او نه هېرېدونکې واقعې لمانځنه کوو.
د عاشورا او محرم الحرام په میاشت کې د نژدې۱۵۰۰ کاله وړاندې د واقعې یادونه او د هغې په یاد د ماتم او غمرازۍ د ناستو او محفلونو جوړول که یوې خواته د اسلام د پیغمبر -صلی الله علیه و سلم- د ګران لمسي امام حسین -رضي الله عنه- او د هغه د یارانو د شهادت له امله درنه او د یادولو وړ ده، بل اړخ ته دا ټکی هم پکې مهم او د پاملرنې وړ دی چې امام حسین -رضي الله عنه- د څه لپاره او ولې په دغه ورځ د یزید د لښکریانو په وړاندې پاڅون وکړ او د دې پرځای چې د خپل کور په یوه خونه کې د آرام او سوکاله ژوند درلودل غوره وګڼي، د اسلامي اصولو څخه د انحراف د مخنیوي په موخه را پاڅېد، خپل ځان، د کورنۍ غړي او نژدې یاران یې قربان کړل خو د یزید خپل سری او له اسلامي اصولو څخه انحراف ته تسلیم نشو.
د عاشورا او کربلا غمجنه پېښه چې تر ننه یې د نړۍ په هر ګوټ کې مسلمانان یادوي او د دې ورځې یاد او خاطره په بېلابېلو ډولونو لمانځي، لدې امله را منځ ته شوه چې یزید او پلویانو یې د مسلمانانو د مسؤولیت او امامت لپاره له هغه وضعه کړای شوي اصول او قواعد تر پښولاندې کړل او له هغې یې سرغړونه پیل کړه چې د اسلام مقدس دین او ستر پیغمبر -صلی الله علیه و سلم- غوره کړي وو او د رسول الله او د هغه د پیاوړیو څلور واړو خلیفه ګانو په عصر کې پلي کېدل او د اسلام سپېڅلي دین د هغې عملي کېدو لارښوونه کړې وه.
حضرت حسین -رضی الله عنه-، د هغه ملګرو او د کورنۍ غړیو یې د راحت او سوکاله ژوند د غوره کولو پر ځای، د یزید د مطلقه او یکه تازې واکمنۍ پر خلاف قیام او پاڅون غوره وګڼلو او پدې توګه یې تر ځان وروسته نسلونو ته دا څرګند پیغام پرېښود چې د اسلام سپېڅلی دین او د ده د محترم نیکه حضرت محمد -صلی الله علیه و سلم- له خوا راوړل شوی شریعت تر پښو لاندی کېدل نشي زغمل کېدای او کله چې یزید او یزیدیان له اسلامي اصولو څخه په سرغړاوي سره د خپل سری او ځان غوښتنې بنسټ ږدي نو باید په وړاندې یې ودرېږو.
دا چې په کربلا کې د حضرت حسین او د هغه د پلویانو د پاڅون په وړاندې د یزید لښکریانو څه وکړل او د کربلا جګړه څه ډول پیل او څه ډول پای ته ورسیده، اوږد داستان دی، خو هغه پیغام چې پرون د کربلا په میدان کې حضرت حسین او د هغه یارانو د خپلو سرونو په نذرانه کولو سره زمونږ د نن ورځې مسلمانانو ته برېښود، هغه دا دی چې د نړۍ په هر ګوټ کې او د قیامت تر ورځې پورې، هم یزید شته چې له اسلام او اسلامي اصولو انحراف او سرغړونه وکړي او هم د کربلا میدان شته چې له خپل سر او مال نه تېر څو تنه مسلمانان د ظلم او خپل سریو په وړاندې ودرېږي او د دغه خپل سریو او ځان غوښتنو په وړاندې له اسلامي اصولو او ارزښتونو دفاع وکړي.
لکه چې ګورو نن د اسلامي نړۍ په هر ګوټ کې د کربلا میدان جوړ شوی او نن د یوویشتمې پېړۍ مسلمانان هم د اسلام د ستر پیغمبر -صلی الله علیه وسلم- د ګران لمسي او ملګرو په دود یې د اسلامي ارزښتنو او اسلامي اقدارو څخه د خپل سر او مال په نذرانه کولو دفاع کوي او پدې لار کې ځان قربانوي.
نن هم لکه چې ګورو د اسلامي نړۍ په هر ګوټ کې د کربلا میدان جوړ دی او نن هم د نړۍ طاغوتي واکمن د یزید په پیروۍ، د مظلومو مسلمانانو په وینو خپل لاسونه سره کوي او نن که د ساینس او ټکنالوژۍ په پرمختګ سره که د کربلا د میدان بڼه بدله شوې هم ده، خو بیا هم د مسلمانانو د عامه وژنې لړۍ هماغسې روانه ده او نن هم د کربلا د میدان په څېر د مسلمانانو د وینو لښتي بهیږي.
خو دا هم باید په یاد ولرو چې د نن ورځې پدې بدلو حالاتو او شرایطو کې هم لا د حضرت حسین -رضي الله عنه- پیروان شته او د یو ویشتمې پېړۍ یزید او یزیدیانو د ځان غوښتنې او قتل عام په وړاندې یې سینې سپر کړي او د خپلو وینو په نذرانه کولو سره له اسلام او اسلامي ارزښتونو څخه د دفاع کلک هوډ لري.و السلام
ـــــــــــــــــــــــ
د نورو تبصرو او خبرونو لپاره زموږ له ټلیګرام، ویب سایټ او د فېسبوک پاڼې له خبري چینلونو سره ملګري شئ⬇️
Telegram:
https://t.me/+Vy9GsPl90MY3NjVl
Web:
FB page:
https://www.facebook.com/Gaheez-News-گهیځ-نیوز-۱۰۵۷۷۲۲۹۹۲۸۴۹۰۳/