گهیځ
ګهیځ: نن شنبه (د مرغومی ۱۸مه) د ترکمنستان د بهرنیو چارو وزارت مرستیال د یو تخنیکی پلاوی په مشرۍ د ټاپی پروژې د بحث لپاره لومړی هرات او نن کابل ته راغلی.
په کابل کې د ترکمنی پلاوی د لیدنو په اړه جزیات نشته خو د هرات د سوداګرۍ او صنعت خونې د یوې خبرپاڼې په خپرولو سره ویلی چې یاد پلاوی دوی سره د ټاپی پروژې د کار پر چټکتیا خبرې کړی دی.
په دغې خبرپاڼه کې ویل شوی چې له ترکمنستانه له راغلی پلاوی سره د یاد هېواد ټاپی پروژې مشر هم ملتیا کوی.
سرچینه زیاتوی، د ترکمنستان د بهرنیو چارو مرستیال ویلی، د دې پروژې لپاره مهم څیز امنیت دی چې اوس په افغانستان کې امنیت راغلی دی، نو ترکمنستان کې د یادې پروژې کار بشپړ شوی او افغانستان کې به هم پیل شی.
ترکمنی پلاوی په افغانستان کې له پخوا د ښه امنیت په تړاو افغان چارواکو ته د دې پروژې د ښه پلی کېدو ډاډ ورکړی.
افغان چارواکو هم د تخنیکی چارو په برخه کې له ترکمنستانه د همکارۍ غوښتنه کړې او ویلی یې دی، هغه لوژیستکی شرکتونه چې غواړی دې برخه کې کار وکړی، د کار زمینه به ورته برابره شی.
د ټاپی پروژه په ۲۰۱۸م زیږدیز کال کې د افغانستان، ترکمنستان، پاکستان او هند مشرانو له خوا پرانیستل شوه.
د دغې پروژې له لارې به ګاز او برېښنا له ترکمنستانه افغانستان بیا پاکستان او له هغه هېواده، هندوستان ته ولېږدول شی.
