گهیځ
ګهیځ نیوز: نن دوشنبه (د وږی/سنبلې ۲۸مه او د سپټمبر ۱۹ نېټه ده) د افغانستان د بشری حقونو لپاره د ملګرو ملتونو ځانګړی راپور ورکوونکی ریچارډ بېنېټ ویلی چې، د نجونو ښوونځی باید سملاسی پرانیستل شی.
بېنېټ پرون له شپږم ټولګی پورته د نجونو د ښوونځیو د تړل کېدو د یو کال پوره کېدو په مناسبت په یوه ټوېټ کې دا خبره کړې ده.
نوموړی ویلی چې ښوونځی باید د ټولو پر مخ پرانیستی وی. هغه په افغانستان کې نجونو او هلکانو ته د مساوی زده کړو د حق ور کولو غوښتنه کړې.
ورته مهال په افغانستان کې د یوناما دفتر سرپرست ماک پوتزل، نجونو پر مخ له شپږم ټولګی پورته د ښوونځیو دروازې تړل یو غمیزه او له شرمه ډکه خبره بللې.
یوناما دا خبره په ګرمسېره سیمو کې د نوی تعلیمی کال په مناسبت خپره شوې خبرپاڼه کې د پوتزل له قوله لیکلې ده:” له شپږم ټولګی څخه پورته د نجونو د پرله پسې محرومولو لپاره هیڅ معقوله توجیه نشته او د نړۍ په هیڅ کونج کې داسې څه نه موندل کېږی”.
د هغه په خبره دا چاره د مېرمنو راتلونکی نسل په پخپله د افغانستان راتلونکی له خطر سره مخ کوی.