گهیځ
کابل/ګهیځ: نن پنجشنبه (د تلې/میزان ۲۸مه او د اکټوبر میاشتې ۲۰مه نېټه ده) د ايران ولسمشر ابراهيم رئیسي د امريکا پر ولسمشر جو بايډن تور پورې کړی چې ايران کې خلک بلوا او د ګډوډيو جوړولو ته هڅوي.
رييسي ويلي، د امريکا ولسمشر چې کله په نورو هېوادونو کې خلک بلوا، ګډوډيو او ورانکاريو ته هڅوي نو ذهن ته يې د ايران د انقلابي رهبر هغه خبرې ورګرځي چې امريکا ته به يې د لوی شيطان خطاب کاوه.
د ايران ولسمشر وروسته له هغې دا څرګندونې کړي، چې بايډن د ايراني لاريونوالو او معترضينو زړورتيا وستايله او پر اخوندي رژيم د هغوی له ځپلو د لاس اخیستو غږ وکړ.
نږدې میاشت وړاندې د ایران اخلاقي امنیت پولیسو په شکنجې د یوې کردۍ پېغلې «مهسا امیني» تر وژل کېدو وروسته په دغه هېواد کې خلک د اعتراض په بڼه سړکونو ته را ووتل او پراخ لاریونونه پیل شو، چې تر اوسه یې دوام موندلی.
تهران د دغو لاریونوالو د ځپلو لپاره پر تاوتريخوالي لاس پورې کړی، چې په خلاف یې په نړيواله کچه غبرګونونه را پورته شوي.
