گهیځ
د رسنیزو راپورونو په اساس د پاکستان د بهرنیو چارو وزارت دغه هېواد خیبرپښتونخوا د ایالتي حکومت د هغه اعلان په تړاو خپل غبرګون ښودلی چې غواړي افغانستان ته دوه پلاوي ولېږي ترڅو د دواړو هېوادو تر منځ د اړیکو ښه والي په اړه خبرې وکړي.
د پاکستاني رسنیو د راپورونو له مخې، د دغه هېواد د بهرنیو چارو وزارت ویاند “شفقت علي خان” پدې تړاو په خپلو څرګندونو کې ویلي دي چې د دغه هېواد د اساسي قانون له مخې، له بهرنیو هېوادونو سره د اړیکو ټینګولو چارې د مرکزي حکومت صلاحیت دی او ایالتي حکومتونه د دې ډول اړیکو او پلاویو د لېږلو صلاحیت نه لري.
دا پداسې حال کې ده چې تر دې وړاندې د خیبر پښتونخوا د اعلی وزیر سلاکار، محمد علي سیف، د تېرې یکشنبې په ورځ ویلي و چې ایالتي حکومت به دوه پلاوي افغانستان ته ولیږي چې په کابل کې له چارواکیو سره خبرې وکړي او په وینایې دا پلاوي د دې لپاره کابل ته لېږل کېږي ترڅو د خبرو اترو لپاره مناسب چاپېریال رامنځته کړي او ډیپلوماټیکې چارې منظمې کړي.
همدارنګه تر دې مخکې د پاکستان د خیبرپښتونخوا ایالت اعلی وزیر علي امین ګنډاپور ویلي و چې په دغه ایالت کې د زیاتیدونکو ترهګریزو پېښو د مخنیوي لپاره به د پاکستان له مرکزي حکومت سره تر سلا مشورې وروسته یو پلاوی افغانستان ته ولیږي، چې د ده په خبره د بېلابېلو قومونو استازي به پکې ګډون ولري.
دا چې د پاکستان د اساسي قانون له مخې د دغه هېواد ایالتي حکومتونه څومره صلاحیت لري یا دا چې افغانستان ته به د ایالتي حکومت له لورې د پلاوي رالېږل د هغه هېواد د اساسي قانون له مخې څومره قانوني یا څومره غیر قانوني وي، دا ټول ځان ته بحث دی، خو د دې موضوع په تړاو له اسلام آباد څخه د بهرنیو چارو وزارت ویاند دومره جدي عکس العمل یوې خواته هلته د قدرت پر سر له یو بل سره د ښکېلو لوریو ژور سیاسي اختلاف ښه په ډاګه کوي بل اړخ ته د افغانستان په تړاو هم د اسلام آباد د ملکي او پوځي چارواکو نیتونه روښانه کولای شي.
دا خبره اوس نه د دوی له خپلو خلکو او نه له نورو نړیوالو پټه ده چې پاکستان په ټوله کې او د دغه هېواد د خیبر پښتونخواه او بلوچستان ایالتونه په ځانګړي ډول د پراخې نا امنۍ او بې ثباتۍ سره مخ دي او نژدې ده چې د اسلام آباد مرکزي حکومت پر دغه دوه ایالتونو باندې خپل کنټرول له لاسه ورکړي، ځکه نو افغانستان ته د خیبر پښتونخواه د ایالتي حکومت له اړخه خبرو اترو او مذاکراتو په نامه د پلاویو د راتللو موضوع د اسلام آباد له اړخه له دومره جدي غبرګون سره مخ شوه او د هغه هېواد د مرکزي حکومت د بهرنیو چارو وزارت سم دلاسه له افغانستان سره د هر ډول خبرو او هوکړې صلاحیت یوازې د اسلام آباد وګڼلو.
بل اړخ ته که ځېر شو نو د اسلام آباد پوځي او غیر پوځي واکمن چې یوې خواته یې د خپل ولس په ملي شتمنیو چور او تالان ګډ کړی او له افغانستان سره هم د خرابو سیاسي او سوداګریزو اړیکو څخه هم د خپلو شخصي ګټو او پر خوار پاکستاني ولس د خپلې ناروا واکمنۍ د تداوم لپاره ګټه پورته کوي، په هېڅ قیمت نه غواړي په هغه ملک په تېره هم په خیبر پښتونخواه او بلوچستان کې سوله او کراري راشي او د ډیورند استعماري کرښې ته څېرمه سیمو کې دې خلک په سوله او امنیت کې ژوند وکړي او له خپلو سیاسي او مدني حقونو څخه دې برخمن شي.
په تېرو څو لسیزو کې چې د ډیورند د استعمارې کرښې دې غاړه او د افغانستان په خاروه کې جګړه او نا امني روانه وه د اسلام آباد همدې سیاسي واکمنو او پوځي جنرالانو هڅه کوله تر څو دلته د نا امنۍ او جګړې څپې روانې وي، همدغه حلقو غوښتل دلته د جګړې له بلو لمبو څخه د ډیورند استعماري کرښې په اوږدو کې د پرتو قبایلو په اېل کولو کې ګټه پورته کړي او پوره ګټه یې پورته هم کړه، خو نن چې بیا د نوموړې کرښې دې خواته د جګړې د اور بلې لمبې سړې شوې، په نورو بهانو سره غواړي دغه قبایلي سیمې تر خپلې واکمنۍ لاندې راولي.
لنډه یې دا چې اوس که د خیبر پښتونخواه سرحدي ایالت یو شمیر مشران او سپین ږیري افغانستان ته راځي او غواړي له خپلو افغان وروڼو سره په ګډه په خپلو سیمو کې د جګړې د بل شوي اور لمبې ووژني بیا یې د اسلام آباد ملکي حکومت او پوځي حلقې مخالفت کوي، څرګنده خبره ده چې دوی وېره لري چې که د ډیورند استعماري کرښې دواړو غاړو ته د مېشتو پښتنو قبایلو اتحاد او اتفاق سره برابر شي، نو په دغه سیمه کې به د اسلام آباد ناروا راج ختم شي او بیا به پدې سیمه کې نه دا جګړې وي او نه د اسلام آباد د ظلم او استحصال دا واکمني. “والسلام”
ــــــــــــــــــــــ
د نورو تبصرو او خبرونو لپاره زموږ له ټلیګرام، ویب سایټ او د فېسبوک پاڼې له خبري چینلونو سره ملګري شئ⬇️
Telegram:
https://t.me/+Vy9GsPl90MY3NjVl
Web:
FB page:
https://www.facebook.com/Gaheez-News-گهیځ-نیوز-۱۰۵۷۷۲۲۹۹۲۸۴۹۰۳/