افغانستان سره د کرکټ نړیوالې شورا له د یو لړ همکاریو ژمنه کړې

کابل-ګهیځ نیوز( د حمل/وري لومړۍ نېټه):
د افغانستان کرکټ بورډ څخه په خپره شوې خبرپاڼه کې ویل شوي، چې د کرکټ بورډ عمومي مشر میرویس اشرف او اجراییوي رییس د کرکټ نړیوالې شورا د غړو هېوادونو د عمومي او اجراییوي مشرانو په غونډو کې ګډون وکړ.
افغان کرکټ بورډ دغه خبرپاڼه کې زیاته کړې، چې د نړیوالې شورا په عمومي غونډه کې افغانستان سره د تخنیکي همکاریو ترڅنګ د بودیجې زیاتولو پرېکړه هم شوې ده.
خبرپاڼه کې راغلي، په یاده غونډه کې نه یوازې دا چې د افغانستان د راتلونکو سیالیو پروګرام تایید شو، بلکې د افغانستان کرکټ بورډ رسمي روزونکو ته د کرکټ نړیوالې شورا له لوري د روان کال د می میاشتې له ۲۰مې تر ۳۰مې نېټې پورې د درېیمې درجې روزنې پروګرام پیلېدل هم تایید شول، چې په کې به لس افغان روزونکي ګډون وکړي.
د خبرپاڼې له قوله په یاده ناسته کې هوکړه وشوه، چې د کرکټ نړیواله شورا به په نږدې راتلونکي کې د لوړو کارکردګیو پروګرام پیلوي چې په ترڅ کې به یې څلور بشپړ او دوهمه درجه غړیتوب لرونکي هېوادونه لوبې کوي.
ـــــــــــــــــــــــ