گهیځ
ګهیځ: نن پنجشنبه (د لیندۍ ۱مه) امریکایې چارواکي وایي په افغانستان کې روان وضعیت خواشینوونکی دی، خو تر هغه چې دوی له هر څه ډاډه نه شي کنګل شوې پانګه نه ازادوي.
د افغانستان لپاره د امریکا د بهرنیو چارو وزارت استازي، ټوماس ویسټ له یوې امریکايي رسنۍ سره په تازه مرکه کې ویلي چې د افغانستان په هره برخه کې له روان وضعیت خبر دي.
دده په خبره د خلکو له ناوړه اقتصادي وضعیت، د ماشومانو له خوارځواکۍ، د معاشونو له ځنډېدو، ښوونځيو او دندو ته د نجونو له نه تګ او نورو مسایلو خبر دي، خو تر هغه چې په افغانستان کې هر اړخیز ډاډ تر لاسه نه شي د کنګل شوې پانګې ازادول او په رسمیت پېژندلو بهیر به پیل نه کړي.
د ويسټ په وینا دوی ډاډه نه دي چې نوی حکومت به د ښځو حقونه وساتي که نه، دغه راز دوی په تمه دي چې د اسلامي امارت چارواکي له نړیوالې ټولنې سره کړې ژمنې عملي کړي.
هغه زیاته کړې چې د افغانستان اوسنی وضعیت بوږنوونکی دی او هر هغه څوک پرې ځورېږي چې له افغانانو سره خواخوږي لري، خو نړیواله ټولنه هم خپل شرایط لري چې باید پلي کړل شي.
