گهیځ
په ډېرې خواشینۍ مو خبر ترلاسه کړ چې د پښتو ژبې نومیالی لیکوال، څېړونکی او فلکوریست ولي محمد سیال کاکړ تر پر له پسې څو کلونو ناروغۍ وروسته نن په حق ورسید.
” انا لله و انا الیه راجعون.”
د رسنیو د رپوټونو له مخې پوهاند ولي محمد سیال کاکړ چې نن د غبرګولي په۲۸مه نېټه د ۸۷ کالو په عمر د کویټې ښار په یوه روغتون کې تر اوږدې ناروغۍ وروسته ساه ورکړه .
مرحوم پوهاند ولي محمد سیال کاکړ په ۱۹۳۵ میلادي کال کې د پاکستان د بلوچستان ایالت د پښین په سیمه کې زېږدلی و، لومړنۍ زده کړې يې همدغلته په خپل کلي کې کړې وې، خو وروسته د کویټې، پېښور او پنجاب پوهنتونونو ته د نورو زده کړو لپاره تللی و او په پښتو، درې او اردو ادبیاتو کې یې درې ماستریانې درلودې.
د افغانستان د علومو اکاډمۍ پخوانی رییس او د سیمه ییزو مطالعاتو اوسنی رییس دکتور ظاهر شکیب د نوموړي مرحوم په اړه وايي چې ښاغلي سیال کاکړ د خپل عمر په وروستیو کې خپل ټول قلمي اثار او آن خپل بشپړ کتابتون چې زرګونه ټوکه مهم او تاریخي اثار په کې وو د افغانستان علومو اکاډمۍ ته ډالۍ کړل، چې دلته ترې ګټه اخیستل کېږي.
ګهیځ د لیکوالو او ژورنالیستانو ټولنه په داسې حال کې چې د مرحوم سیال مړینه د پښتو ادب او فلکلور په ساحه کې یوه نه جبرانېدونکې ضایعه ګڼي، په داسې حال کې چې نوموړي ته له لوی خدای نه د مغفرت غوښتنه کوي د هغه کورنۍ، شاګردانو او د پښتو ادب او فلکلور ټولو مینه والو ته پدې مناسبت د زړه صبر او اجر غواړي.
