گهیځ
ګهیځ د لیکوالو او ژورنالیستانو ټولنې د مشرتابه پلاوی او اداره پدې توګه د هېواد د پیاوړي استاذ او ژبپوه، د کابل پوهنتون د پښتو ادبیاتو استاد پوهاند احمد شاه “زغم” د مړیني له امله د خپل ژور خفګان مراتب د هغه کورنۍ، شاګردانو او مینه والو ته وړاندې کوي. “انا لله و انا الیه راجعون”
مرحوم دکتور زغم د هېواد او آن د سیمې په کچه یو تکړه لیکوال، څېړونکی، ژورنالیست، ژباړونکی او شاعر ؤ چې ګڼ شاګردان یې روزلي او پراخ علمي خدمات یې ټولنې ته وړاندې کړي دي.
خدای بښلی پوهاند دکتور احمدشاه زغم د حاجي رازمحمد زوی په ۱۳۳۵ کال کې د کابل ولايت د پغمان په ولسوالۍ کې زېږېدلی ؤ چې خپلې لومړنۍ زده کړې د پغمان په ولسوالۍ کې پیل او په ۱۳۵۶ کال کې له نوموړې لېسې فارغ شو.
مرحوم استاد زغم په ۱۳۵۷ کال کې د کابل پوهنتون د ادبياتو او بشري علومو پوهنځي ته شامل او په ۱۳۶۱ لمریز کال کې د نوموړي پوهنځي له پښتو څانګې څخه فارغ شو چې بیا په ۱۳۶۲ کال کې د کابل پوهنتون د ژبو او ادبياتو پوهنځي د پښتو څانګې د علمي کادر غړی شو.
خدای بښلي استاد زغم په ۱۳۶۷ کال کې د کابل پوهنتون د ژبو او ادبياتو پوهنځي له پښتو څانګې څخه د ماسټرۍ سند ترلاسه کړ او په ۱۳۹۶ کال کې د کابل پوهنتون د ژبو او ادبياتو پوهنځي په پښتو څانګه کې د دکتورا زدهکړې پای ته ورسولې.
خدای بښلی استاد زغم په ۱۳۸۵ لمريز کال کې د کابل پوهنتون د پښتو څانګې آمر وټاکل شو او په ۱۳۹۴ کال کې یې د علمي خدمت مودې تر پوره کولو وروسته د پوهاند علمي رتبه ترلاسه کړه.
نوموړي د خپل علمي خدمت پر مهال ګڼ آثار ټولنې ته وړاندې کړي دي چې ځنې یې ناچاپ او ځینې بیا د چاپ په ګاڼه سمبال شوي دي.
ګهیځ د لیکوالو او ژورنالیستانو ټولنه پداسې حال کې چې خدای بښلي پوهاند دکتور زغم ته د الله تعالی نه جنت الفردوس او د هغه پاتې کورنۍ، شاګردانو او مینه والو ته د زړه صبر او اجر غواړي، د هغه مړینه د افغانستان په علمي او اکاډمیکه ساحه کې یوه لویه او نه جبرانېدونکي تشه ګڼي. روح یې ښاد او جنت یې ځای شه.
