هندي رسنۍ وايي، چې هېواد یې په افغانستان کې خپل سفارت بېرته پرانیزي.

ګهیځ: نن چهارشنبه (د لیندۍ ۱۰مه) د هندي رسنیو د راپورونو له مخې د هند د بهرنیو چارو وزارت ویلي چې، دوی هوډ لري څو په افغانستان کې خپل ډيپلوماټیک ماموریت له سره پیل کړي او خپل سفارت پرانیزي.

سرچینه وایي چې د اسلامي امارت له راتګ وروسته د دغه هېواد سفارت په کابل کې خوندي دی او هېڅ ډول ګواښ نه دی ورته جوړ شوی چې له امله یې دوی په کابل کې د خپلو فعالیتونو د بېرته پیلولو په لټه کې دي.

بلخوا افغان حکومت بیا تازه د سعودي عربستان د قونسلي خدماتو له پیلېدو هرکلی کړی دی.

د بهرنیو چارو وزارت په خپره شوې خبرپاڼه کې راغلي چې د سعودي عربستان ډیپلوماټان کابل ته راغلي دي او د دغه سفارت قونسلي برخه یې پرانستې ده.

د بهرنیو چارو د وزرات په خبرپاڼه کې راغلي، چې اسلامي امارت په پلازمېنه کې د ټولو سفارتونو د بېرته پرانیستل کېدو ملاتړي دي او تمه لري چې له نړیوالو سره یې اړیکې ښې او عادي حالت ته را وګرځي.