گهیځ
ګهیځ: نن سې شنبه (د لیندۍ ۱۶مه) د ملګرو ملتونو عمومي اسمبلۍ د افغانستان څوکۍ په اړه د ځانګړې کومېټې پرېکړه تصویب کړه، چې له مخې یې دغه څوکۍ غلام اسحاقزي ته پاتې شوه.
غلام اسحاقزی په ملګرو ملتونو کې د تېر افغان حکومت دایمي استازی و، چې د یاد سازمان ځانګړی کمېټې یې پر خپل ځای د پاتې کېدو پرېکړه کړې ده.
په ملګرو ملتونو کې د افغانستان استازولۍ په خپله رسمي ټویټر پاڼه کې ویلي: ”د ملګرو ملتونو عمومي اسمبلۍ د باور اسناد ورکولو کمېټې له لوري د ملګرو ملتونو عمومي اسمبلۍ د ۷۶ دورې لپاره د افغانستان اسلامي جمهوریت استازي ته د باور ورکړل شوی لیک منلی دی”.
واک ته د اسلامي امارت له رسېدو وروسته، طالبانو خپل غړی سهیل شاهین په ملګرو ملتونو کې د افغانستان د دایمي استازي په توګه معرفي کړ.
خو د ملګرو ملتونو ځانګړې کومېټې تېره چارشنبه پرېکړه وکړه چې په عمومي اسمبلۍ کې دې د افغانستان څوکۍ د اوس لپاره اسلامي امارت ته نه ورکول کېږي.
په دې ځانګړې کومېټه کې د امریکا، روسیې، چین، سویډڼ، بهاماس، بوټان، چیلي، نمیبا او سیري لیون هېوادونو استازي شامل دي.
اسلامي امارت د ملګر ملتونو سازمان دې تازه اقدام ته کوم غبرګون نه دی ښودلی خو سهیل شاهین تېره چارشنبه پر خپله ټوېټر پاڼه لیکلي وو، چې د افغانستان خلک حق لري چې یو خپلواکه هېواد ولري او د دې لپاره یې څو لسیزې مبارزه کړې.
نوموړي دا هم لیکلي، پکار نه ده چې افغانانو باندې بندیزونه ولګول شي او په ملګرو ملتونو کې له خپلې څوکۍ بې برخې شي.
