ګهیځ: نن یکشنبه (د سلواغې ۲۴مه) د غزني د سوداګرۍ او پانګونې خونه وايي، په دې ولایت کې د صادراتو او وارداتو بهیر په نورمال ډول روان دی.
د دې خونې مشر عبدالمتین قلندري رسنیو ته وویل، له وروستیو سیاسي تحولاتو وروسته دې ولایت کې د څه مودې لپاره صادرات او واردات کم شوي وو، خو له دوو میاشتو راهیسې په نورمال ډول روان دي.
ښاغلی قلندري وايي، د دې ولایت سوداګرو، ممیز، بادام، د رېشقې او د شوتلې تخم هند، پاکستان او روسیې ته صادر کړي چې بدل کې یې خوراکي توکي او برېښنايي وسایل وارد کړي دي.
که څه هم ښاغلي قلندري د غزني ولایت د صادراتو او وارداتو په اړه کره ارقام وړاندې نه کړل، خو ويې ویل چې په روان لمریز کال کې افغانستان له یو میلیارډ څخه ډېر صادرات درلودل.
![](https://www.gaheez.af/wp-content/uploads/2022/02/photo_2022-02-13_01-54-39-650x330.jpg)